ᐱᒋᐊᕐᓂᓕᒍᑏᑦ

ᑖᒃᑯᐊ ᐃᓄᒃᑎᑐᑦ ᐅᖃᐅᓯᓕᕆᐅᑏᑦ ᐃᓕᓴᕐᓂᒧᐊᖓᔪᓂᒃ, ᓄᐃᓚᕿᓯᒪᔪᑦ ᐊᑯᓂ ᐱᓇᓱᐊᖃᑎᒌᑦᑐᓄᑦ ᐃᓕᓴᕐᓂᖅ ᐱᑦᔪᑎᒋᑦᓱᒍ ᐱᓇᓱᐊᑐᓄᑦ, ᐃᕗᔨᕕᒻᒥᐅᓄᑦ ᐳᕕᕐᓂᑐᕐᒥᐅᓄᑦ ᑯᐯᑉ-ᐊᐱᑎᐱ ᐃᓕᓴᕐᕕᔪᐊᖓᓐᓂᒥᐅᓄᑦ (UQAT). ᐊᓕᐊᓐᓂᐸᐅᕗᒍᓪᓗ ᐊᑐᐃᓐᓇᕈᒍᓐᓇᓯᒐᑦᑎᒋᑦ ᐊᑐᕋᑦᓴᐅᓚᖓᓕᕐᑎᓗᒋᑦ 2019 ᐊᕐᕌᒍᖓᓂ, ᐅᖃᒍᑕᐅᓯᒪᓕᕐᑎᓗᒍ ᓄᓇᕐᔪᐊᓕᒫᒥ ᐊᕐᕌᒍᖁᑎᖓᐅᓂᕋᕐᑕᐅᔪᒥ ᓄᓇᖃᖅᖄᓯᒪᔪᑦ ᐅᖃᐅᓯᖃᕐᓂᖓ ᐃᓕᑕᓯᔭᐅᓯᒪᓕᕐᑎᓗᒍ ᑲᑐᑦᔨᖃᑎᒌᓐᓂᑯᖏᓐᓄᑦ ᓄᓇᓕᕐᔪᐊᑦ ᑲᑎᒪᔨᒻᒪᕆᖏᓐᓄᑦ.

ᐱᓇᓱᑕᐅᒋᐊᖕᖓᓯᔪᕕᓃᑦ ᑖᒃᑯᐊ 1984-ᒍᑎᓪᓗᒍ ᐃᓄᐃᑦ ᐃᓕᓭᔨᐅᒋᐅᕐᓴᓂᕐᒥᒃ ᐊᐅᓚᑦᓯᔨᒋᓲᖏᓐᓄᑦ ᐃᓚᒋᔭᐅᔪᑦ ᐱᔭᑦᓴᖏᓐᓄᑦ ᐃᕗᔨᕕᒃ-ᐳᕕᕐᓂᑐᖅ-ᑯᐯᑉ-ᐊᐱᑎᒥᐅᓪᓗ. ᓯᕗᓪᓕᐹᒥ ᐃᓕᓴᕆᐊᖕᖓᓯᓚᐅᕐᓂᕋᒥᓂᑦ ᐃᓕᓴᕐᑐᑦ ᐃᓕᓭᔨᐅᒋᐅᕐᓴᓂᕐᒥᒃ ᑐᑭᓯᓪᓚᕆᖃᔭᕐᓂᑦᔭᖏᒻᒪᑕ ᐃᓕᓴᕈᑎᐅᔫᕐ ᐃᓗᓕᑦᓴᔭᖏᓐᓂᒃ, ᐃᑎᔪᒃᑯᑦ ᖃᐅᔨᒪᓂᖃᒻᒪᕆᒐᓗᐊᕐᓱᑎᒃ ᐅᖃᐅᓯᕐᒥᓂᒃ, ᑭᓯᐊᓂᓕ ᐊᕐᓱᕈᖃᑦᑕᓚᐅᔪᔪᑦ ᐅᖃᐅᓯᑦᓴᔭᖏᓐᓂᒃ ᐃᓕᓴᕐᓂᒧᐊᖓᔪᑦ, ᐅᖃᐅᓯᕐᒥᑎᒎᕐᑐᖃᖕᖏᒧᓪᓗ ᐃᓕᓴᕐᓂᒧᐊᖓᔪᓂᒃ. ᓄᐃᑦᓯᒐᓱᐊᕈᒪᓕᓚᐅᔪᔪᑦ ᐃᓄᒃᑎᑑᕐᑐᓴᖏᓐᓂᒃ ᐃᓕᓴᐅᖏᑦᑕ.

ᑌᒣᒻᒪᑦ ᐊᕐᕌᒍᕐᓂ ᐊᒥᓱᓂ ᐃᓄᐃᑦ ᓵᑦᑕᕕᐅᓲᑦ ᐃᓄᒃᑎᑐᑦ ᐅᖄᒍᓐᓇᓯᐊᕐᓯᒪᔪᑦ ᐃᓕᓴᕐᓯᒪᑦᓯᐊᓱᑎᓪᓗ ᓇᓪᓕᐊᓂᑐᐃᓐᓇᖅ ᐃᓂᓖᑦ ᐃᓕᓴᕐᓂᒥᒃ ᐱᓇᓱᒐᖃᕐᓱᑎᒃ, ᐱᓇᓱᐊᖃᑦᑕᓯᒪᕗᑦ ᐃᓄᒃᑎᑐᑦ ᐅᖃᐅᓯᓕᕆᐅᑎᑦᓴᓂᒃ ᐃᓕᓴᕐᓂᒧᐊᖓᔪᓂᒃ ᐊᑐᕐᑕᐅᖃᑦᑕᕈᒫᕐᓂᐊᑐᓂᒃ ᐃᓄᓐᓄᑦ ᐃᓕᓴᕐᑐᓄᑦ ᐃᓕᓭᔨᐅᒋᐅᕐᓴᓂᕐᒥᒃ, ᐃᓕᓴᕐᕕᔪᐊᒥ ᐃᓕᓭᔨᒧᑦ ᐃᑲᔪᕐᑎᖏᑦ, ᐃᓕᓴᕐᕕᔪᐊᒥᓪᓗ ᐃᓕᓭᔨᓄᑦ. ᐊᕐᕌᒍᕐᓂ ᐊᒥᓱᓂ ᐱᓇᓱᐊᖃᑎᒌᒍᑕᐅᖃᑦᑕᓯᒪᕗᑦ ᓯᕙᓂᐅᑎᒃᑯᑦ, ᐊᒻᒪᓗ 2003 ᐊᕐᕌᒍᖓᑕ ᐱᒋᐊᕐᓂᖓᓂ ᑲᑎᒍᑕᐅᕙᓐᓂᐊᓕᕐᒥᒐᒥᒃ ᐊᕐᕌᒍᑕᒫᑦ ᑲᑎᓂᕆᓲᒍᓕᕐᑕᖓᓂ.

ᐃᓘᓐᓇᑎᒃ ᐱᓇᓱᐊᖃᑕᐅᕙᑦᑐᑦ ᑖᒃᑯᓂᖓ ᐱᓇᓱᐊᖃᑎᒌᑦᓯᐊᒪᕆᐊᓗᑦᓴᖃᑦᑕᕆᐊᖃᕐᓯᒪᔪᑦ ᑲᔪᓯᑦᓯᐊᑐᒥᒃ: ᐊ) ᐃᓱᒪᒥᐅᑦᓯᑐᕆᐊᖃᕐᓱᑎᒃ ᐅᖃᐅᓯᕐᑕᖏᓐᓂᒃ ᐃᓕᓴᕐᕈᑕᐅᓕᕐᑑᑉ; ᐸ) ᑕᑯᓐᓇᕋᓱᐊᖃᑦᑕᕆᐊᖃᕐᓱᑎᓪᓗ ᑐᑭᖏᓐᓂᒃ ᐅᖃᐅᓯᓕᕆᐅᑎᒍᓐᓇᑐᓂᒃ; ᑕ) ᑐᑭᓯᓇᓕᕐᑎᕆᖃᑦᑕᕆᐊᖃᕐᓱᑎᓪᓗ ᖃᓄᐃᓕᓪᓚᕆᒻᒪᖔᑦ, ᖃᐅᔨᒪᓪᓚᕆᑦᑐᓂᓪᓗ ᐊᐱᕐᓱᖃᑦᑕᕆᐊᖃᕐᐸᓱᑎᒃ ᐅᖃᐅᓯᐅᑉ ᓇᓪᓕᐊᒍᑦ ᐊᑐᕐᑕᐅᒍᓯᖓᓂᒃ; ᑲ) ᐃᓕᓴᕐᓯᒪᔪᓂᒃ, ᐃᓄᓐᓂᓗ ᖃᐅᔨᓂᐊᕐᕕᓴᕐᓂᒃ ᐅᖄᑎᑦᓯᖃᑦᑕᓱᑎᒃ ᑐᑭᓯᔭᖏᓪᓕ ᖃᓄᐃᓕᖓᒻᒪᖔᑕ; ᐊᒻᒪᓗ ᒐ) ᐊᐱᕐᓱᖃᑦᑕᓱᑎᓪᓗ ᐃᓄᓐᓂᒃ ᖃᐅᔨᓂᐊᕐᕕᓴᕐᓂᒃ ᐊᒥᓱᓂᒃ ᑐᑭᓯᓐᓇᐅᑎᓂᒃ ᐅᖃᖃᑦᑕᖁᑦᓱᒋᑦ ᐃᓄᒃᑎᑐᓪᓗ ᑐᑭᓯᓐᓇᐅᑎᑦᓴᖏᓐᓂᒃ ᐅᖃᐅᓯᕐᑕᓴᖓᓂᒃ ᐊᖏᖃᑎᒌᒍᑎᖃᑦᓯᐊᖏᓐᓂᓕᒫᒥᓂᒃ. ᑌᒣᒻᒪᑦ ᑖᒃᑯᐊ ᐅᖃᐅᓯᓕᕆᐅᑎᕗᑦ ᕿᑲᕐᑎᑕᐅᑐᐃᓐᓇᖁᓇᖕᖏᓚᑦ ᐊᑐᕐᑕᐅᖃᑦᑕᓗᑎᓪᓕ ᐅᖃᐅᓯᕐᓂᒃ ᐃᓄᒃᑎᑑᕐᑐᓂᒃ ᑕᑯᒐᓱᐊᕐᕕᐅᒍᓐᓇᓗᑎᒃ ᒪᓂᔭᐅᓯᒪᔪᓂᒃ ᐅᓇᑕᒐᕐᑕᐅᓯᒪᔪᓂᒃ ᑌᒪᖕᖓᓂᓚᑳᖅ ᖃᐅᔨᒪᑦᓯᐊᑐᑦ ᐃᓱᒪᒐᓱᐊᕈᑎᒋᓯᒪᔭᖏᑦ ᐅᖃᐅᓯᖕᖑᑎᖃᑦᑕᓱᒋᑦ ᐅᖃᖃᒌᒍᑎᒋᕙᑦᓱᒋᑦ.

ᐱᕙᓪᓕᐊᔭᐅᕙᓪᓕᐊᒪᑕ ᐅᖃᐅᓯᓕᕆᐅᑏᑦ ᐊᑦᔨᒌᖕᖏᑐᑦ ᐊᑐᕐᑕᐅᒋᐊᖃᖃᑦᑕᓯᒪᔪᑦ ᐃᓕᓭᕕᒻᒥ. 2000 ᐊᕐᕌᒍᖓᓂᒥᑦ ᐃᕗᔨᕕᒃ-ᐳᕕᕐᓂᑐᖅ-ᐃᓕᓴᕐᕕᔪᐊᕐᒥᐅᓗ ᐱᓇᓱᖃᑎᒌᑉᐸᑐᑦ ᓄᑕᐅᓯᓕᕐᑎᕇᓐᓇᓕᒫᓚᐅᔪᔪᑦ ᐅᖃᐅᓯᕐᑕᖏᓐᓂᒃ ᐅᖃᐅᓯᐅᓪᓗ ᐁᑉᐱᐅᑎᖓᓄᑦ ᐊᓪᓚᑕᐅᒍᑎᕕᓂᖓᓂᒃ ᐅᑎᕐᕕᙯᓐᓇᖃᑦᑕᓱᑎᒃ ᑐᑭᓯᒋᐊᓪᓚᕈᑎᕕᓂᕐᒥᓂᒃ ᐃᓱᒪᑖᕈᑕᐅᓯᒪᓕᕐᒥᔪᒥᒃ ᐃᓕᓴᕐᕈᑎᒋᓕᕐᒥᔭᒥᑕ ᐃᓗᓕᕆᓕᕐᒥᔭᖏᓐᓄᑦ, ᐃᓄᒃᑎᑑᕐᓂᖅ ᐊᑦᑕᓇᕐᑐᒦᓕᕐᑎᓗᒍ, ᑖᒃᑯᐊ ᐅᖃᐅᓯᓕᕆᐅᑏᑦ ᐃᓕᓴᕐᑐᑐᐃᓐᓇᓄᑦ ᐃᑲᔪᕐᓯᒍᑕᐅᒐᓱᐊᑐᐃᓐᓇᔭᖏᑦᑐᑦ ᐃᓅᔪᑦ ᑭᖑᕚᒐᓴᖏᓐᓄᑦ ᐃᓕᓭᔨᐅᕙᓚᖓᔪᓄᑦ ᐱᓇᓱᑦᑎᐅᓂᕐᒥᓄᑦ ᐅᖃᐅᓯᖃᑦᓯᐊᓚᖓᕙᖁᓪᓗᒋᑦ ᐃᓱᒪᖃᓯᐅᑦᔨᓯᐊᓗᑎᒃ ᐃᓕᑦᓯᓯᒪᑦᓯᐊᕆᐊᖃᕐᓂᖏᓐᓂᒃ ᐃᓄᐃᑦ ᐅᕕᒐᕐᑐᐃᑦ ᐅᖃᐅᓯᓪᓚᕆᒻᒥᓂᒃ ᐊᑐᕐᓗᑎᒃ.

ᓇᑯᕐᒦᒃ / Thanks / Remerciements  

ᐳᕕᕐᓂᑐᖅ-ᐃᕗᔨᕕᒃ-ᑯᐯᑉ ᐊᐱᑎᐱᐅᓪᓗ ᐃᓕᓴᕐᕕᔪᐊᖓᓂᑦ ᐃᓕᓭᔩᑦ ᐃᓕᓴᕐᓂᖏᓐᓂᒃ ᑐᑭᒧᐊᑦᑎᓯᔨᖏᑦ ᐱᒋᐊᕈᑎᖃᕐᓯᒪᔪᑦ ᓴᐳᑦᔨᓱᑎᓪᓗ ᑖᒃᑯᓂᖓ ᐅᖃᐅᓯᓕᕆᐅᑎᓂᒃ, ᓇᑯᕐᒦᒍᒪᕗᑦ ᐋᖅᕿᒋᐊᕐᑕᐅᒋᐊᖃᕐᓂᖏᓐᓂᒃ ᑲᑎᖕᖓᔨᖏᓐᓂᒃ, ᐱᓇᓱᐊᖃᑕᐅᖃᑦᑕᓯᒪᔪᓂᓪᓗ ᐃᓕᓵᒐᓴᓐᓂᒃ ᐃᓕᓭᖃᑦᑕᓯᒪᔪᓂᓪᓗ ᐊᕐᕌᒍᕐᓂ ᐊᓂᒍᕐᑐᓂ ᐃᓱᒪᑖᕈᑎᖃᕐᓯᒪᔪᓂᒃ ᐃᓄᒃᑎᑑᓕᕐᑎᒋᐊᖃᕐᓯᒪᓂᖏᓐᓂᒃ.

The Puvirnituq-Ivujivik-UQAT teacher training co-management group which initiated and supported the development of this lexicon, wishes to thank the members of the editorial committee, its collaborators as well as all the students and trainers who, over the years, have proposed the concepts to be developed in Inuktitut.

Le groupe de cogestion des programmes de formation des enseignants inuit Puvirnituq-Ivujivik-UQAT, qui a initié et soutenu le développement de ce lexique, tient à remercier les membres du comité éditorial, ses collaborateurs ainsi que tous les étudiants et formateurs qui, au fil des ans, ont proposé les concepts à développer en Inuktitut.              

ᐋᖅᕿᓱᐃᖃᑕᐅᓯᒪᔪᑦ / Editors team / Comité éditorial 

  ᐃᑲᔪᕐᓯᖃᑦᑕᓯᒪᔪᑦ / Guest collaborators / Collaborateurs invités 

ᖃᕆᑕᐅᔭᒃᑯᑦ ᐊᑐᐃᓐᓇᐅᒥᔪᖅ /An online version is also available /Une version en ligne est aussi disponible

 http://urfdemia.uqat.ca/lexique/index.php/ui/

ᐊᑐᐊᒐᖕᖑᓚᖀᔫᒃ / produced by / réalisé par :

ᐳᕐᓅᒪᒃᑯᑦ, ᓇᑯᕐᒦᒃ ᑑᒪᓯ ᒪᖏᐅᖅ

Pirnoma Technologies, Thanks to Thomassie Mangiok

ᖃᐅᔨᒋᐊᑦᓯᐊᕈᒪᒍᑦᓯ / To refer to this lexicon / Pour citer ce lexique :

 ᐅᖃᐅᓯᓕᕆᓯᒪᔪᑦ ᐳᕕᕐᓂᑐᖅ, ᐃᕗᔨᕕᒃ, ᑯᐯᑉ ᐊᐱᑎᐱᐅᓪᓗ ᐃᓕᓴᕐᕕᔪᐊᖓ UQAT (2019). ᐃᓄᒃᑎᑐᑦ ᐅᖃᐅᓯᓕᕆᐅᑏᑦ ᐃᓕᓴᕐᓂᒧᐊᖓᔪ.

Lexicon group Ivujivik, Puvirnituq, UQAT (2019). Inuktitut lexicon in Education.